千里屋食堂 (Closed)

本來想食隔離間日本野不過見好多人等唔想排，咁岩見到呢間新開，專食日本牛，就入去試下啦。店入面好新，好似日式連鎖既格局，唔算好大但坐得都幾舒服。熟成黑牛丼$159用左300克安格斯牛翼板肉，搭到好似山咁高，成10幾塊淨係食肉都飽。牛肉煎到7成熟，岩岩好無血水既狀態，好滑溜好軟熟，個醬汁都好重牛肉味但都幾甜同重黑椒味，送飯幾好，但送牛就有d蓋過牛既味。浪漫牛shabushabu $380個餐有3款韓式前菜，但其實味道偏甜同淡，似日式前菜多d，仲有野菜，豚肉，烏冬同鹿兒島縣和牛。煲入面其實已經滿晒野菜，但額外仲有d娃娃菜同菇，分量好多，蔬菜好新鮮，個餐都幾健康既。三層豚肉比較肥，味道較淡。和牛雪花分布幾靚，入口即溶，牛味濃得黎好順滑。埋單600蚊左右，唔算平但話晒都和手，質素ok，如果食丼會抵d。