津記車仔麵 (Closed)

呢間就係我人生食過最好味嘅一間車仔麵！先講佢個環境，新淨！問老闆，原來間餐廳都係啱啱開咗兩個月。餸同醬汁嘅選擇，我覺得比起一般多。我自己叫咗碗麻辣豬腸、炸魚肉、春卷、柱候牛腩同牛柏葉出前一丁，汁就揀咗沙嗲醬。佢啲餸真係好高質！春卷好脆口！牛腩幾乎舊舊都帶筋！至於麻辣豬腸真係唔係講笑，超級辣！食到我出晒汗，鍾意辣嘅朋友必試！如果想加辣，枱面亦都有辣菜脯。我老公就叫咗碗牛腩、冬菇、雞翼、牛柏葉伊麵。佢個冬菇又係我強推，勁入味！$60都唔使就有高質車仔麵連嘢飲，好嘢，一定要推介！唔單止嘢食高質，職員嘅服務態度亦都係一流！親切友善，賓至如歸。