有得餃 (Moved) New Location

搬咗入嚟元朗都三四年喇，對上一次食就係啱啱搬入嚟無幾耐，佢啲餃除咗名目比較多之外，味道其實無乜特別，印像中個餃皮好似仲幾厚吓添，最正其實係佢個汁啫，今日睇報紙見到佢有份搞快餐車，先至令我醒起佢嘅存在。不過唔知係咪因為用咗啲人手去搞快餐車嘅關係，佢哋呢間舖嘅人手明顯有啲緊張，做仔嘅喺廚房密密做之餘，仲要出埋樓面招呼人客，真係戥佢辛苦；媽咪就主要負責樓面，人年紀大咗手腳自然就無咁爽㗎啦，阿仔見到阿媽手腳慢就喺度詐哂型，不留情面咁樣喺啲客面前燥阿媽。嗌咗個秘製醬汁撈麵，加咗四隻蒜香萵筍豬肉餃，個麵嗌咗中辣，個秘製醬汁酸酸辣辣咁勁開胃，蒜味又夠哂重，個餃食到粒粒爽口嘅萵筍粒，不過如果豬肉嘅比重多番啲我相信會更好食，個餃皮 keep 住都係咁厚，呢個就係我幾年後先再嚟第二次嘅主要原因喇。不過不得不讚口水雞上面用醋醃過嘅蒜頭粒，令到個口水雞生色不少。