大頭蝦南風海鮮酒家

Open Now

Now Closed

原來東涌逸東邨附近都有好嘢食，仲要係風味大排檔，呢啲嘢惹味我最鍾意，Google map嘅地址都好準確，揸車去好方便，仲可以泊車喺門口，食完就揸車走，冇得頂。呢間＜大頭蝦＞ 幾特別，竟然有一個自己嘅燒味檔，唔通佢啲燒味出品唔錯？ 另外，外賣單都一張接一張，相信係東涌市民嘅飯堂。餐廳都有分室外同室內，我坐係室內，位置都唔少。事不宜遲，點幾樣嘢食下先。燒味雙拼餐廳職員話呢度啲燒腩仔好正，係幾得喎！暖暖地皮又脆。另外油雞都好滑，而且份量都唔少，啲個價幾好幾好！蜜桃沙律蝦球份量爆多，尤其是啲蝦球，薄薄嘅炸粉炸咗再撈沙律醬，仲係有啲脆，配埋蜜桃一齊食，就好似巴馬臣火腿配蜜瓜一樣，好夾！避風塘茄子必點！超級出色嘅避風塘菜色，茄子炸粉唔厚，茄子裏面一啲都唔油，傳統避風塘炒法，有洋蔥、豆豉、辣椒一齊炒，非常惹味！＜大頭蝦＞啲嘢食非常多元化，我見有人食酸菜魚，有人食全隻燒鵝，都有人食蒸海鮮，值得一讚係佢啲燒味，真係唔錯！另外，我都對佢啲小炒有信心，個避風塘真係煮得幾好，我睇返佢餐廳啲相，竟然仲有烤乳豬，不過呢個就真係可能要預訂，有興趣嘅真係要問一問先，整體嚟講，我好鍾意呢間餐廳嘅味道同氛圍，真心推介！