大呷台灣 (Closed)

諗住返工係附近搵下有咩好食啦，本身諗住同同事去食酸辣粉，但點知比呢間舖頭嘅外觀吸引左入去食。 雖然最近台灣開返關，但都無咁快去到。咁咪諗住食餐台灣野懷念下以前去旅行嘅日子啦。 點知啲嘢一上枱就知道中伏喇。首先杯凍檸茶已經好似去咗小人國，照睇都係得200ml。完全係《食神》入面嘅「隻杯有咁細得咁細，啲冰有咁大粒得咁大粒，枝飲管有咁粗得咁粗。」嘅完美演繹。 咁飲品呢啲野都係其次，但個肉燥飯冇得抵瀨啦。身為一間主打食台灣菜嘅餐廳，肉燥飯呢啲野係基本野。個飯係大，但佢居然可以難食過罐頭肉燥。汁少又肉鞋，食完就真係燥。 個雞排炸粉厚都唔係問題，但佢黎到嘅時候只有中心係暖嘅，明顯炸好左之後放咗一陣。所以佢啲皮係少少脆、多多韌，味道一般。 小食蒜香四季豆味道正常，冇乜特別，所以不評論。 總而言之，中伏指數甚高。直升機指數🚁：3.8/5推薦指數：1/5（如果你想做勇者就去啦！）