三希樓 (Closed)

見好多人喺食評讚，當然要來食一次，點知中伏！首先講服務，一直見到裏面有空位，亦有客人啱啱食完走咗，職員執完枱都冇叫我哋坐低，以為有人book咗枱或者係留俾火鍋客，我同朋友喺門口等咗差唔多15分鐘，職員先叫我哋入去坐，就係坐喺一開始見到嘅空枱，我坐低之後見到出邊仲有好多客人排隊等，其實裏面有空位，好多客人好似我哋一樣要喺出邊等15分鐘先安排佢哋入坐，唔通咁樣係搞噱頭？叫咗一個水煮魚$398可以話係我食過最難食嘅水煮魚，佢嘅酸菜係淡而無味，最敗筆嘅地方係啲魚好腥，加埋淡而無味嘅酸菜簡直引唔起食慾，可能水煮魚會好啲，因為麻辣味會冚過腥味，咁嘅價錢俾啲咁腥嘅魚，連小店都不如！再叫咗一個豆腐腦滑牛肉，大約$250豆腐好滑，不過有少少苦，加咗牛肉同汁落去完全食唔到苦味，牛肉上面放咗焗過嘅黃豆粒好香，牛肉係好滑，不過連基本牛肉嘅肉質都食唔到，可能自己唔係食得太辣，呢個都食剩咗好多！最後叫埋單要叫兩次先至有人睬你，唉！