海港薈

Open Now

Now Closed

7月24日，特意揸車去青衣城shopping兼食晏。我哋兩人都想飲茶，去咗三樓海港薈。雖然好近下午茶時間，但都唔想等，寧願正價時間入座。叫咗好幾個點心，其中包括「腐皮素鵝」，心想係自己認識嘅腐皮卷之類。點知嚟到以為上錯菜，因為見到幾件用炸粉嚟做嘅點心，完全領會唔到，原來就係「腐皮素鵝」。初時話俾一位女部長知，上錯點心。點知佢極度無禮貌咁答我，呢個咪係「腐皮素鵝」囉！我直覺咁答，唔係喎、呢個一啲都唔似，都唔係我哋想食嘅嘢。但佢堅持話，佢哋酒樓係咁做呢個「腐皮素鵝」，如果我哋唔要，咁佢哋酒樓賣俾邊個呀！真心唔想食！除咗唔想咁熱氣食咁多炸粉、呢個點心嘅賣相又唔好、而且油淋淋、見到都無晒胃口！其實佢哋嘅其他點心都比一般大酒樓做得差！好似個豉椒牛肚，一嚟到見到鋪著好厚又竭(杰撻撻) 嘅生粉䊢，真係無晒胃口！食物無水準、服務就更差！呢間酒樓，真係唔知點樣喺呢個時勢生存！