Steak Bar (Closed)

今次中午去咗銅鑼灣食牛扒，係好多身邊嘅朋友食完推介我去嘅，午餐時間去到都唔使點排隊，坐低睇咗一陣餐牌就叫咗石燒薄切牛肉同澳洲穀飼肉眼扒。首先嚟咗啲頭盤嘅沙律同埋豆腐沙律菜新鮮爽口，有少少醋，加車厘茄，食咗份外開胃。另豆腐嫩滑清新，加上少少芝麻醬同蔥花，點綴左平淡無味嘅佢。係好好嘅一道前菜。之後，套餐加配嘅小食薯條都黎啦每一條都好粗炸到金黃色，咬落去外面鬆脆內里軟綿綿，加上小小鹽同胡椒，十分惹味，令人食唔停口。講左咁耐終於黎到主菜啦，我就集中講下自己食嘅澳洲穀飼肉眼扒啦，牛扒好大塊亦都好厚身，表面煎到深啡色得黎又唔會燶，未上台已經聞到香味。用刀輕輕就已經可以切開牛扒，里面呈現粉紅色，仲有唔少肉汁流出黎，細細口食一啖，感覺到肉質軟腍腍得黎仍然保持到小小肉嘅彈性，食落有好重嘅牛肉味，由於係肉眼，脂肪比較上無咁多，食多幾啖都唔會覺得油膩。最後跟餐仲附上一碗白飯，用靚牛排黎送飯，可能大家會覺得有D奢侈，其實係最適合不過，白飯清淡，同牛油同肉汁混和埋一齊食可以更凸出牛扒嘅肉香，令我地可以更清楚品嚐到牛扒應有嘅味道。以一個午餐來講唔算平，但食物嘅品質高，所以都算值得嘅。