Video
Read full review
2014-05-02
7111 views
小肥家中有位叔叔，自從退休後，每日都會花多個鐘頭打網球，以及睇不同類型o既球賽，其熱誠程度足以令家人封佢為「波痴」 。為咗方便打網球，波痴叔叔早幾年成為咗印度遊樂會（簡稱「印遊會」）o既會員，每個禮拜都會去嗰度打幾日波。有一次家庭聚餐，正當大家談論緊邊度o既炸子雞最好食時，叔叔就話印遊會個中廚所煮製o既脆皮炸子雞必定名列前茅！因為肥肥家族當中只有大肥爸爸一個聽過「印遊會」依個會所，小肥隨即打蛇隨棍上，叫叔叔擇日帶我地去驗證 。印遊會位於香港大球場隔離，由銅鑼灣地鐡站步行約十分鐘左右，如果有私家車就最方便，因為門口有多個標位，標位滿哂又可以泊架車喺附近個露天停車場，收費為$7半個鐘。整個印遊會地方唔算大，不過都有好多設施，包括四個網球場、草地滾球場、羽毛球場、健身室、麻雀室等。據波痴叔叔所講，印遊會會員每月交咗會費，就可以白天免費享用網球場設施，全為雙打，除非沒有人等，打完一局（1 set）或到6:6便要離場等候下一個時段，夜晚去打都只係收燈錢，聽落都好公道。會所o既餐廳分四部份：第一部份係只可以點小食同飲品o既酒吧及lounge area；第二部份係室內座位，一眼望哂，只有七張四
有一次家庭聚餐，正當大家談論緊邊度o既炸子雞最好食時，叔叔就話印遊會個中廚所煮製o既脆皮炸子雞必定名列前茅！因為肥肥家族當中只有大肥爸爸一個聽過「印遊會」依個會所，小肥隨即打蛇隨棍上，叫叔叔擇日帶我地去驗證 。
印遊會位於香港大球場隔離，由銅鑼灣地鐡站步行約十分鐘左右，如果有私家車就最方便，因為門口有多個標位，標位滿哂又可以泊架車喺附近個露天停車場，收費為$7半個鐘。整個印遊會地方唔算大，不過都有好多設施，包括四個網球場、草地滾球場、羽毛球場、健身室、麻雀室等。據波痴叔叔所講，印遊會會員每月交咗會費，就可以白天免費享用網球場設施，全為雙打，除非沒有人等，打完一局（1 set）或到6:6便要離場等候下一個時段，夜晚去打都只係收燈錢，聽落都好公道。
會所o既餐廳分四部份：第一部份係只可以點小食同飲品o既酒吧及lounge area；第二部份係室內座位，一眼望哂，只有七張四人枱，同兩張八人圓枱；第三部份o既室外座位則有五張四人枱；而第四部份就係草地及帳篷內之座位。大家要留意，假日黎用膳必定要預先訂座，尤其係嗰兩張八人圓枱。餐廳並無裝潢o既裝修，地板、餐桌、餐具都較舊，最唔舒服就係冷氣唔多夠，小肥食到滴哂汗，加上樓面低，所以都幾嘈吓。
印遊會餐廳內o既員工只有四位，其中幾個女仔都不懂中文，所以我地全程以英語溝通。唔知係咪唔憂做呢，佢地o既服務態度都可算係幾惡劣，除咗全程黑面之外，寫飲品又落錯咗幾次單，當客人催促食物時更加係敷衍對答，小肥真係感覺非常意外 ！
據知，會所有兩個大廚，因會員大多食印菜為主，所以負責印度菜嗰位印度廚師有幾個助手，而負責中菜嗰位師傅就冇人幫 ，要獨力支撐。印遊會係波痴叔叔o既地頭，食物方面當然係佢話哂事啦！叔叔知道我地當中只有靚仔哥哥同舅父食得辣，所以都只係叫咗兩味咖哩及幾款傳統印度小食，其餘就係佢極力推介o既炸子雞同菜。
涷檸蜜（$14）：杯檸蜜唔係好夠蜜糖，感覺稀而無味 ，飲罐$10可樂好過。
Vegetable Samosa印度咖哩角（$20/四件）：咖哩角屬小辣，香脆野味得黎又唔係好油，$20四件真係幾抵食。
Bhindi Masala香辣秋葵（$45）：舅父大讚秋葵爽脆味濃，可惜小肥唔係好食得辣，所以都只係食咗一兩口。
Garlic Naan蒜蓉薄餅（$18）：新鮮熱辣o既蒜蓉薄餅好鬆軟，如果蒜蓉味可以再濃多少少就更perfect啦！
Butter Naan牛油薄餅（$18）：牛油薄餅同蒜蓉薄餅一樣夠哂熱辣辣，牛油味道亦好香，不過個人比較鍾意食濃味啲o既蒜蓉薄餅。
Chicken Vindaloo紅辣咖哩雞（$65）：紅辣咖哩雞係勁辣，小肥試咗一羮仔都已經流哂鼻水！
Hydrabadi Keema Curry香辣免治羊肉（$80）：叔叔話，如果佢一個人食飯，好多時都會叫碗白飯送依味香辣免治羊肉。可能係香辣o既咖哩味蓋過咗o既原固，免治羊肉咖哩一啲蘇味都冇 ，唔講真係唔知自己食緊羊肉，配上白飯食真係好正！
Stir-Fried Lettuce腐乳炒唐生菜（$55）：少辣o既腐乳唐生菜好香脆，而且好夠鑊氣，就連平日唔食菜o既XO仔都食咗大半碟，絕對唔講得笑 ！
Fried Crispy Chicken脆皮炸子雞（$160）：餐牌例明，炸子雞必需最少二十四小時前預訂。可能中廚冇助手o既關係，波痴叔叔推介o既主菜兩點鐘先起，好在都冇令肥肥家族失望！炸子雞皮脆、肉嫩、少肥、兼夠熱，就連雞胸肉都完全唔乾唔嚡，我地六個人十分鐘內食哂成隻雞 ，可想而知有多麼美味，唔怪得知大廚要壓軸上枱啦！叔叔話，佢當年入會，隻脆皮炸子雞只係賣$100，估唔到而家加到$160 。
Masala Tea印度奶茶（$12）：杯印度奶茶只係有陣香草味，茶味卻唔夠濃郁，奶茶亦唔夠滑溜 。
午餐食物連酒水，普通會員埋單合共$551，即每人約$90，其實都已經好抵，但因叔叔剛剛成為六十五歲o既長者會員，可享用於會中頭二千元消費之八折優惠，結果埋單只需$440.8，即每人$75有找，大家仲覺得超值囉 ！總結，印遊會內之餐廳雖然地方唔大，亦唔係話好靚，但勝在食物美味，用餐時可同時進食中菜及印度菜，價廉物美，同長者會員去更可享有優惠，大家都大讚好抵好抵！嘻嘻，得知會所並無加一服務費，為咗美食，小肥絕對可以容忍服務生頗為惡劣之態度，叫波痴叔叔再帶我地去食印度薄餅、香辣免治羊肉、及脆皮炸子雞等美食 ！
Post
