基隆茶餐廳 (Closed)

我覺得一間食肆只幫襯過一次就去評論，有時難免流於武斷，因為每間食肆定必有強項弱項，食啱食唔啱，感覺可以差之毫釐，謬以千里。幫襯基隆茶餐廳嘅兩次經歷，就係其中一個最好嘅例子。第一次去，當時唔太肚餓，叫咗個蝦多士拼薯條下午茶餐，蝦多士唔係由細到大食慣一塊麵包上面鋪住蝦膠嗰種，而係將啲蝦仁放喺麵包入面再成塊炸，好似有餡嘅西多士咁，食落口感有啲怪：出面係香脆嘅麵包，但入面係軟腍嘅蝦仁，兩者落差比較大，至於薯條水準亦一般，炸得比較硬身。當時已經估計，呢間嘅西式食品應該唔係主菜。回家後睇食評，果然中式食物才最耍家，所以第二次去，二話不說就叫咗碟乾炒牛河。一上枱，見到條條河粉色澤均勻，滿佈油光，已經蠻有信心，一啖入口，只覺河粉香，鑊氣夠，牛肉亦軟腍有肉味，認真唔錯。值得一提既係，小店居然採用紙飲管，為環境出一分力，真係意想不到😮。深水埗新店位於超過七十年樓齡嘅恒貞大押舊址，成棟建築物外觀滿有歷史感，店內亦保留咗兩邊有圓拱嘅石牆，頗有欣賞價值。