Mint Supper Club (Closed)

中環收工，想同個朋友happy hour 再順便食個dinner。行過雲咸街見到間裝修幾少女既餐廳。我同朋友就決定入去試下。呢間酒吧餐廳嘅格調主要係以藍燈/紅燈為主，主打越泰菜。由於朋友係歐洲翻嚟，所以揀咗個望街景嘅位坐。Mojito （$120）有別於一般mojito，幾清新唔會太甜。Whiskey Sour （$138）入口甘苦，唔會太酸。軟殻蟹柚子沙律（$68）用料不錯，夠大隻仲有少少膏添，微酸嘅柚子撈入火龍果同微甜嘅泰式醬汁，平衡番蟹嘅油膩感，前菜嚟講非常開胃。炸蝦餅（$68）味道好好嘅一份小食，蝦餅炸到脆卜卜，蝦肉好夠蝦鮮味，沾啲甜酸醬，食落更好胃口。我同朋友食完一塊又一塊。泰式炒捲心菜（$68）呢個捲心菜炒得好香好出色，好惹味嘅蒜香味!菜亦唔會炒得太熟，食落青脆爽口。海南雞飯（$108）雞脾唔會太肥，食落口好嫩滑。配埋棷油飯真係好香口。棷油飯頂部放左隻溫泉蛋，攪拌後令棷油飯更加有口感。