一虎 (Closed)

年頭到九州自由行, 食拉麵食到上曬癮, 今日就嚟到高質美食雲集嘅SOHO搵日本正宗豬骨拉麵！呢度以香濃豬骨湯底見稱, 湯頭加入大量豬骨 & 蔬菜, 淆足12小時！就連麵底都分別有直身同曲麵兩款俾你揀, 非常講究！兩者有咩分別？原來曲麵加咗蛋黃, 比較有彈性, 而且hold到較多湯汁。而直身麵口感較為順滑, 配合濃稠湯底就最適合啦。我揀嘅呢款海老虎拉麵, 濃郁豬骨湯底再加上海老油、櫻花蝦, 為原本已經濃厚嘅湯頭再增添風味。 雖然濃湯比較適合配直身麵, 但我個人特別鐘鍾意濃湯掛麵嘅感覺, 揀曲麵就完全做到呢個效果啦。叉燒厚薄適中, 肉質偏瘦, 非入口即溶type, 但質感實在,食落帶濃郁肉香。拉麵講究, 小食亦同樣出色！呢個煎餃子, 底部煎至金黃色, 咬落外層微脆, 入面餡料鮮味多汁, 自家製確係唔同啲。