Pho Bar (Closed)

喺中環見完客，有少少肚餓，發現呢個巷仔都有好多舖頭，就入嚟搵吓有冇嘢食，見到呢間越南餐廳門口細細但好似都得過一D 獎，上網再查一下，見到評分唔錯，便搵位坐低。餐牌上主菜選擇唔算多，但全部都係傳統越南麵食，亦有幾款特色小食。至尊（生熟牛柳片、牛腩、牛肉丸、牛柏葉、扎肉）河粉，講到明至尊有齊好多唔同嘅材料，10分豐富，湯底好靚，應該用咗好多唔同材料煲出嚟，有層次感。喇沙配蝦、魚片及魷魚等，湯底亦濃郁，不過唔算辣，啱晒唔食得辣嘅人，蝦幾新鮮亦有超過5隻，咁大手筆。越式炸春卷，水準合格。冰山燒豬頸肉有水準，厚切豬頸肉有口感，肉質結實，唔會太肥，調味亦唔會鹹，加生菜一齊食更好。