福祿壽健康素食

Open Now

Now Closed

成日經過都會見到lunch time有條買外賣既人龍，今日決定要試下係乜咁勁！望個價錢係真心好抵，兩餸廿八。三餸多三蚊不過有埋湯喎！佢好簡單，每日外面會放好number標記左佢有既唔同餸，有成十三款，都幾多選擇！你行埋去同佢講邊幾個號碼就可以。番到公司即刻飲個湯，今日個湯係粟米雜豆煲南瓜。入面都有啲湯渣，主要係紅蘿蔔同豆。個湯好清，唔似係味精湯。我要左6號. 葡汁燴四蔬，個葡汁味幾好，不過個汁係唔重芡，少少稀，但我又幾鍾意！10號. 西芹藕片炒雙花。無勁大驚喜啦，不過我鍾意食藕片！11號. 菜甫叉燒炒滑蛋，佢係素食店，所以係素叉燒，不過其實我主要只係食到菜甫同滑蛋，好食！飯我要紅米，不過佢既紅米量超少，幾乎望唔到。我叫左少飯，佢就用餸填滿我個盒，啲餸多到要搬去另一邊先見到自己個飯。總括而言，平快正。唔怪得之日日都有人龍。