Pho Bar (Closed)

今日喺中環收工，好彩有朋友介紹，帶我嚟呢度。門面都好簡潔低調，喺中環黎講比較靜嘅利源西街。餐廳唔係好大，大約十幾至20個位，有小店嘅感覺。餐牌內容非常清晰易明，睇落單只上面自己填就得啦。我同朋友要咗兩個至尊越南河粉，嘢飲叫咗青檸梳打，再加多個冰山燒豬頸肉做小食。青檸梳打係用左泰國象牌梳打水，連用料都好講究，梳打水加落青檸汁之後味道好清新，唔會太甜。 冰山燒豬頸肉燒得好入味，肉質嫩滑口感有彈性，配上生菜同醬汁，將燒豬頸肉嘅油份中和，值得推介。至尊套餐非常豐富，至尊包含牛柏葉、生熟牛柳片、牛腩、牛丸、同越南扎肉，乜都有齊曬，一次過滿足到好多個願望。湯底清甜，充滿thai basil嘅陣陣香味，唔會太咸，而且河粉好滑溜，加少少青檸就足夠吊味。因為材料實在太豐富，真係食到超級滿足。總括黎講喺中環食到呢個價錢嘅晚餐，性價比真係超高，食物質素、環境、同服務都非常滿意，一定會再幫襯。