頹飯 (Closed)

中環打工仔除了捱貴午餐之外，仲要忍受正午時分街上的高溫、汽車廢氣。不過，小弟發掘到一間價格公道、味道超班的外賣小店，速度極迅速，係打工一族的福音！「頹飯」Le Hea Rice位於利源東街中段，舖面雖小，五臟俱全，基本上雞豬牛都有得揀。價廉物美已經唔足夠形容呢間「頹飯」。$38-60一個便當飯盒包飲品，大家可知呢度係中環，舖頭餐廳一個燒味飯已經60個大洋了！「頹飯」的夫妻檔老闆似乎體會到絕大部份打工仔為搵平而好食的餐廳而惆悵的心意，特意設計出幾款大眾化的飯盒，供一班嘴刁的「食家」選擇。小弟第一次食，見到個氣勢「厚切特級午餐肉煎蛋飯」咁勁，一於試試。落單大約3分鐘就拿到，極度快速。開盒發現，竟然有3塊午餐肉+2個煎蛋咁豐富！每塊午餐肉都厚過一條木筷子！😱而且肉質嫩而結實，啖啖油香充斥著味蕾。絕對是一流的午餐肉！煎蛋亦不錯，流心蛋黃一刺即穿，蛋汁鮮美，伴上甜豉油來撈飯，滿足感爆燈！盒內還有車厘茄、粟米粒，不怕變成食肉獸，老闆果然體貼！順帶一提，可以do八達通或Alipay，十分方便！而且可以用Apps提前落單，再來舖面提貨，對於分秒必爭的中環一族來講十分便捷。