深井陳記燒鵝 (Closed)

話說我發覺我冇寫過中菜嘅食評，最近又想試呢間嘅下午茶，所以就分別叫咗兩個燒味雙拼瀨粉，順便攞嚟寫食評。呢個係我叫嘅，有豉油雞同燻蹄。豉油雞同其他舖頭差唔多，唔算滑（唔知係唔係部位問題），有淡淡地嘅豉油味。我覺得今次叫嘅燒味入面，燻蹄係最好食嘅。非常爽口，而且味道啱啱好，唔會太淡或者太鹹。瀨粉好普通，都係淡淡地嘅湯加啲爽爽地嘅瀨粉囉。呢個係啊媽叫嘅，有燒腩仔同燒鵝。燒腩仔係令我最失望嘅，已經凍咗，啲皮一啲都脆，仲要超級鹹。燒鵝都冇想像中咁好食，因為都係凍咗。呢度可以再嚟，燒味唔可以話好好食或者好難食，抵食程度唔錯。今次試過嘅燒味入面，最值得一試嘅係燻蹄。如果我下次再嚟，我應該會試叉燒，自己本身鐘意食，加上網落幾正。