唐宮中餐廳

Open Now

Now Closed

講起浪漫，好似個個都諗起西餐，但其實中餐因為果份親切感同傳統嘅味道，反而我覺得更加浪漫。呢區其實喺旺角行完街過嚟，好似去咗另一個仙境咁，唔會好多人，好舒服嘅地方。餐廳喺酒店二樓，裝修唔算好靚，但係好有親切感。吸引我嚟嘅，係facebook廣告介紹呢間餐廳嘅大江南北菜。所以嚟到第一時間叫侍應要咗個menu，裡面全部都係嚟自唔同地方嘅特色菜。江西手撕羊係冷菜，同唔同嘅配料撈埋一齊，非常開胃，好適合依家天時咁熱嘅時候食。金錢雞，可能未必好多人識，但係係屬於香港嘅一個回憶。以前燒味鋪會有得食，但係好似喺香港已經無幾個地方食得到了。由中間層豬肉嘅爽脆程度可以知道大廚落足心思。宋嫂魚羹，所有配料嘅份量恰到好處，每啖湯都係精華。無錫脆鱔，鱔肉起出嚟，非常適合我呢啲唔鐘意吐骨嘅人。而且，肉質真係有脆嘅感覺，唔係薯片果種脆，而係一種結實嘅感覺。拔絲蘋果，雖然好多地方都食到，但係呢度一啲都唔會覺得甜膩，而且蘋果嘅清甜，配上冰水浸過嘅糖漿，夏天恩物。