Rachel's Cookies (Closed)

筆者向來鍾情曲奇，皆因曲奇口味千變萬化，有鹹有甜、或脆或軟，為人帶來唔同新鮮感，況且材料種類繁多，不同人更可按個人喜好挑選自己的心水味道。早前和食友 Ivy 一起晚飯，為另一甜姐兒慶祝生日，細心的她特意為我倆送來了每人一盒曲奇，光是這份心意，已足夠令人感動，在此先行謝過。其實拿回家當晚，一看口味，紅棗杞子花茶曲奇，嘩，將中式元素加入曲奇入面，口味非常創新喎，當時就已經想拆開立刻品嚐。咦，唔係喎，情人節快到，反正我這等老餅不會像後生仔般節目多多，到時倆口子沖壺花茶，再配上花茶曲奇，相信亦不失為賞心樂事。其實近年的曲奇產品，單在包裝上已花了不少心思，就以這盒 Rachel’s Cookies 為例，連手抽袋都印上自家品牌名稱，加上金碧輝煌的包裝紙盒、打成精緻美觀蝴蝶結的手挽，方便攜帶、以至每塊曲奇都用上獨立玻璃紙包裝等，用來送禮，的確夠曬大方得體。至於今次吃的曲奇，內裡加入了寧神的紅棗和明目的杞子粒，味道香醇天然，口感香脆煙韌，既滋味又養顏，口味非常創新獨特，好有新鮮感，值得一試。在此再次謝謝食友的美意。