彩晶軒 (Closed)

舊同事聚舊日,太耐無見,一班女士們決定食豪佢,就大家地方去左呢間酒樓到食,近工業區就真係幾方便大家,好耐冇去過酒樓食小菜了,仲要係豪野,6個人叫左好多個特別的小菜,有幾款賣相好靚又幾好味!龍蝦湯瑤柱海皇羹-龍蝦湯多數都用係西餐上,而喱個就中西式混合,用上了龍蝦湯的瑤柱海皇羹,夠創新的配搭,既有龍蝦湯味道又不失瑤柱海皇羹本身的鮮味,感覺新鮮,質感唔會太杰太稀合求好處,同好足料,特別係多瑤柱,好滿足!千島香芒貴妃蝦球-賣相好精緻,中間用芋片整成玫瑰花蠻搶眼,炸蝦球面層有名貴魚子,入口外皮脆,芒果味感覺清新,內裡鮮蝦爽口,伴上千島醬酸酸甜甜幾開胃,色香味俱全。半肥瘦叉燒-聽聞係呢間酒樓的招牌之一,叉燒的確周圍都食到,但係要係好食既都真係冇乜邊間...而呢到竟然有,單看賣相都幾吸食了,好多蜜汁,好惹味,叉燒入口鬆化,肉質嫩,加上有少少肥膏,味道更甘香可口好味呀!好豐富既一餐,飯後去左APM行下,好方便呀只係隔離,下次聚會再來食先!