林氏廚房 (Closed)

朋友係大廈員工，放假返公司OT，我接佢放工，佢就帶我到平時食開嘅大廈飯堂開餐。 餐廳喺嘉圖工廠大廈4樓，假日嘅工廠大廈特別寂靜，估唔到一入餐廳，就非常熱鬧，另有一番光景~時間尚早，但已經有好多枱客。 我哋就揀咗中西合壁嘅【二人套餐】，價錢雖然唔係特別平，但就好大份量。 飲品係自家製作，有羅漢果茶同桂圓紅棗蜜，特色又滋潤。是日餐湯粟米忌廉湯，香甜濃稠，配搭香草包，飲完都幾飽。大蝦煙三文魚沙律芝麻醬以為只係兩碗仔，點知係一大盤，有驚喜喎。面頭仲有兩片煙三文魚同兩隻爽口大蝦。小食拼盤：炸茶樹菇、炸雞軟骨、紅油抄手，炸雞軟骨新鮮炸起熱辣辣，可惜炸茶樹菇係室溫。主菜「鵝肝拼紐西蘭牛柳」兩件厚牛柳，表面微焦帶點脆口，做得唔錯。 鵝肝嫩滑，不油不膩又無半點羶味。自家制叉燒配日本太陽蛋飯，即刻諗起電影食神入面嘅黯然銷魂飯，自家製嘅叉燒，肥瘦適中，面頭有香甜蜜汁，再加一隻日本蛋。 本來已經好飽，但都食晒成個飯，好食呀。 最後甜品有日式芝士蛋糕同紅絲絨蛋糕。成個套餐真係巨大份呀。