茶餐廳2.0 (Closed)

茶餐廳就係茶餐廳，見到一間茶餐廳叫自己做茶餐廳2.0， 裝修彷彿都以西式感覺為主 ，忍唔住又去一探究竟！見到Menu中式西式都齊備，廚師好似咩都識咁樣，有冇咁犀利呀？叫得茶餐廳，直覺都會係中式嘢食會比較穩妥，所以今次都係叫咗中式，睇下佢係唔合格先。見到有個餐，幾個小菜任揀兩款，已經配埋例湯、基本飲品、炒菜、白飯，索價只係1 6 8，抵呀！例湯～ 天氣咁凍，飲碗熱湯，真係令人舒暢。蒸紅袖魚～ 魚有一隻筷子咁長， 蒸到啱啱好，唔會過熟。肉鬆炒四季豆～ 由於四季豆要走油，好多地方都做到油冧冧，但係呢度做得幾乾身，而且份量、味道都恰到好處。炒青菜～ 以為份量唔會好多，畢竟係配搭嘅嘢， 但實際上分量都非常合理 ，出街食飯，點都要有碟菜較為健康，非常欣賞寫呢個餐牌嘅人，考慮到顧客的健康。而飲品我哋都選擇咗基本飲品，冇乜特別，但係凍飲杯同熱飲杯，就係非一般茶餐廳嘅模樣。最後當然以甜品做結尾， 呢個甜品唔係中式甜品，亦都唔係西式甜品 ，我可以形容呢個甜品為「港式甜品」， 佢竟然係雞蛋仔上面加上cream、生果同埋雪糕， 淨係雞蛋仔呢個元素，已經令我深深愛上。