養心麵 (Closed)

網上見到呢間車仔麵店既介紹，我係俾台式配料而吸引過黎既，特別係台灣A菜同水蓮。其實佢唔近我公司，都要大約十分鐘路程。我中午12:15去到，仲有唔少位可以揀，不過轉眼間就滿哂人。我點左水蓮、千層冰豆腐同埋滷水豬大腸、寬粉條、美人湯，唔辣亦都唔要任何其他醬料。呢度係一落單就要俾錢先，食物隨後送到。先試一啖湯，淡淡既清甜，都有少少層次感，網上食評話材料有烏雞、桃膠、杞子、南棗同金華火腿等，我就剩係飲到金華火腿既味道，亦都食到兩大舊桃膠，感覺幾滋潤。配菜味道尚可，水蓮我覺得煮得熟左少少，冇左佢特有既爽脆口感，冰豆腐即係平時既蜂巢豆腐，吸左湯一齊食唔錯既，大腸滷得幾入味，都夠淋，闊粉條類似紅薯粉，不過比較薄，不過掛湯力唔算強。食幾食有個小插曲，就係隔離檯話佢地點既鴨血有酸味唔新鮮，侍應有即刻換過俾佢地，其實我既滷水豬大腸食到最後一舊都有少少酸味，不過由於係最後一件，我都冇出聲了。價錢喺中環黎講中規大矩，食物都係，我唔會再為佢行十分鐘了。