Add Some Thai Restaurant

Open Now

Now Closed

餐廳位於觀塘工廠區，裝潢頗有特色，流水波波燈，木系色調，燈光柔和，環境闊落，空間感十足，仲有兩間獨立箱房可以邊食邊唱K、打牌同玩Switch，價格親民且地點方便，好適合約埋一大班朋友仔嚟聚餐。前菜有鮮蝦青木瓜沙律，用玻璃樽裝住，上面放上四隻鮮蝦，下面鋪滿沙律菜，唧埋泰式醬汁，食落開胃。小食拼盤包含蝦片、蝦餅、雞/豬嘅串燒同豬頸肉，蝦片脆身唔油膩、蝦餅爽口談呀、串燒入味唔嚡、豬頸肉油滋四溢，最緊要點埋個沙嗲醬，自家製熱辣辣唔好錯過。另外值得一提嘅係個香脆七味雞軟骨，帶咬口，脆卜卜，唔算好鹹，性價比高。湯品有椰皇椰青雞湯，好清好甜，估唔到雞肉嫩滑多汁啖啖肉，仲有個火熱住，唔怕凍啦！炒菜款式都有唔少選擇，可以自行搭配炒法同品種，薑汁炒豆苗淡淡薑汁香氣，豆苗比較少見，可以試試。主食有酥炸軟殼蟹炒黃咖喱，軟殼蟹有兩大隻，炸至酥脆可口，黃咖喱偏甜唔辣，下面仲有少量蔬菜同埋煮至腍身嘅薯仔，法式蒜蓉包吸滿咖喱汁，如果鍾意食脆身少少嘅建議先攞出嚟。另外有雜菌金邊粉，份量多，入味但唔油。最後以椰汁千層糕作結，甜度適中，食完飽飽。