芝加哥串燒 (美豐花園) (Closed)

收工去開大埔墟，有朋友介紹，太和間串燒幾正又唔貴，又有手工啤飲，所以兜一兜黎試下。店內唔多位，4張枱，十多個位。亦都有戶外位，不過天氣熱都無乜人坐。叫左支手工啤，梨味無咁甜，酒味唔算好重，好易入口。香草芝士焗雜菌，一啲都唔淡，芝士唔多所以無搶走啲菇味，再加上香草吊味，味道一流！雪花牛肉串同和牛串，兩者肉味都好重，和牛因為夾住大蔥燒比較香，而雪花牛肉就燒得比較淋。鹽燒牛舌，唔算好厚，所以食落唔韌好爽口。鹽燒同蜜糖雞翼，一啲都唔乾，咬落去啲肉汁仲漏緊出黎，不過蜜糖再落多少少會更好味。原條黃立䱽燒，好香，始終燒魚都會有啲腥味，不過唔洗落檸檬都接受到，始終落左檸檬就會搶左魚本身既味，所以建議大家試左先睇下落唔落檸檬。招牌茄子燒，唔少地方都有得食，不過大部份鋪都比較吝嗇放係上面既調味料。呢到就唔同，茄子上面既蔥蒜都好多，所以味道完全足夠。