永恆豬雜粉

Open Now

Now Closed

聽谷友講開左間新麵店仲幾好食，是日特登黎搵下，地點都唔算難搵，係水車館街，呢條街都好多野食。門口有個豬頭幾吸睛，寫住全部係新鮮豬雜，仲係即叫即煮喎，試下先。餐牌簡單直接，全部都係豬，價錢仲好貼地添。點完野就慢慢等食，小店不大，只有三張枱，等食期間都唔少人外賣。叫左份特價雙併麵加配滷水小食半份+飲品，全部加埋都係$66，抵食。碗麵係豬潤瘦肉米粉，諗緊要豬雜好定豬潤好，最後揀左後者，其實兩樣都想食啦。豬潤清潔做得好，入口柔軟爽滑，無化學味，瘦肉亦很鮮味，係好食喎。米粉份量都唔少，清湯底都好味，有芫茜粒正呀。小食係滷水大腸，唔知仲有咩滷水小食揀呢，餐牌得大腸，但我估應該有其他野揀。半份大腸份量也不少，肥滋滋有咬口，滷水汁帶甜，滷得入味好食噃。再飲埋支蜜桃紅茶，夠哂凍，天氣熱飲凍飲特別爽。價錢唔貴又好食，有下次喎。臨走前先留意到原來佢自設肉檔，仲有三間分店添，咁啲豬真係確保新鮮，正。