Green Common (如心廣場二期) (Closed)

Green common 開到好多地方都有，愈來愈多人願意試下素食。呢間店鋪最突出係佢賣既好似肉但其實冇肉成份既「未來肉」。未來肉既產品已經出左唔少，仲有埋未來肉午餐肉、漢堡等等，好食又唔會有罪惡感。我地一班人叫左4樣野食。第一樣係未來午餐肉配素蛋既五穀「頹」飯。未來午餐肉食落真係好似真午餐肉，有曬佢果種少少煎完既香脆味同鹹味，亦有佢果種彈口既肉感。素蛋口感似玉子燒，食落係豆味冇蛋味。第二樣野食係咖哩未來肉漢堡扒飯，日式咖喱汁少少偏甜香口，漢堡肉好野味，味道係同真肉漢堡有少少分別架啦，不過又唔會覺得差好遠味道怪，大概最大分別係冇左肉類既油脂味。成個飯雖然聽落係heavy但係食落又唔覺膩同油，又唔覺因為食得油而有罪疚感。另外叫左兩款小食分別係紅油抄手同未來雞堡。未來雞堡其實第二間餐廳都有，口感味道同麥樂雞差不遠。紅油抄手夠惹味，同真抄手可以話冇分別，係份量少左啲，但都不妨試吓。