茶茶GO (Closed)

如果有睇開我食評嘅人，就知道我好鍾意去飲黑糖珍珠鮮奶，今日天氣好凍，行過灣仔見到呢一間飲品店，就毫不猶豫入去叫咗一杯熱珍珠鮮奶茶。另外見到有個雪櫃放咗好多甜品，職員見我雙眼發光係我等待嘅時候仲好熱心咁樣同我去介紹，所以最後我受唔住誘惑，決定買兩個紫菜肉鬆小貝去試吓！先講一下杯熱飲，拎上手嘅溫度適中並不燙手，其次珍珠幾好咬口，但略嫌珍珠有時會痴住，未能做到每一啖都係一粒粒嘅感覺～茶底都帶有輕微回甘，不過就入唔入我心目中頭三甲嘅位置。甜品方面，餐廳講明即日製造，食落都覺得係既，小貝外層好脆口，肉鬆和紫菜都有炸過，內層蛋糕都算鬆軟，中間更加上咸蛋黃醬，層次感做得唔錯，但略嫌小貝的蛋糕未夠濕，做唔到入口軟綿綿，而且定價有小小貴（20/2件），試過一次就夠啦！都明白而家做飲品店嘅市道唔係太好，所以都10分欣賞餐廳提供更多元化嘅選擇！