聰嫂星級甜品 (Closed)

是日星期五，女友OT到九點幾，見咁夜佢話唔想食飯，想去食返d甜嘢開心下，就一於來搵聰嫂啦。未去到舖頭，已經見到一條人龍，想食嘅唔需要拎飛，去隊尾慢慢排就得了。雖然前面都有差唔多二十人，但因為流量高，大約十分鐘就有得食了。龍眼嘅甜品唔係好多地方有得食，所以我叫咗呢個龍眼椰果冰。入口非常冰凍，有好濃龍眼味，配埋煙韌嘅椰果同珍珠，辛勞咗一個星期食返碗真係份外醒神。女友叫咗芒果奶昔雙皮奶，芒果好鮮甜，雙皮奶口感幼滑，芒果奶昔配埋雙皮奶味道唔會太甜，食晒成碗都唔會覺得好漏。食完埋單門口人龍都無短過，聰嫂果然係名不虛傳。