鼎泰豐

Open Now

Now Closed

星期五難得齊人，約咗去沙田食飯。鼎泰豐係我哋首選，先到先等。阿女最早到，七點就去到等位，唔使七點半就可以坐低了。太耐冇食台灣菜喇，一於食番夠本。四個人開餐，一共嗌咗八樣嘢。開胃涼菜要咗香干馬蘭頭同紹興酒醉雞。馬蘭頭雖然係野菜，但係就有一種特別嘅味道，喜歡食佢嘅人愛不釋手，我就係其中之一。醉雞係屋企人鍾意嘅，呢度做嘅醉雞有非常濃郁的紹興酒香，唔似其他餐廳啲這味餸，做到酒還酒，雞還雞，好似風馬牛不相干的。嚟到呢度，當然係要食餐廳出名嘅小籠包。皮薄餡靚，肉汁鮮甜，香港呢個地方也真心搵不到另外一間餐廳的小籠包可以做到咁出色了！台式酸辣湯和蝦肉紅油炒手也都是我想念的，當然也各要了一份解解饞。主食方面叫咗個紅燒牛肉麵、蝦仁蛋炒飯同台式擔擔撈麵。我個人的至愛係牛肉麵。牛肉煮得非常入味，湯汁鮮美，令人百吃不厭。炒飯粒粒分明，每一口都吃到蛋香。呢餐雖然唔平，但係我哋食得非常之開心，算係近期食得比較心滿意足的一餐！