九丁目日本料理

Open Now

Now Closed

由於疫情關係，出街食飯都少咗。今日放假想抖下氣，同老公去嘆反個日式晚餐先。 門口有好大個牌寫住9點後半價，一入門有個職員比搓手液我哋， 看來呢個疫情大家都高度重視!地方開揚光猛， 裝修好靚，非常有日式氣氛。 香菇大大片而且好重香菇味，蒸蛋夠曬滑， 味道唔會太鹹， 烹調時間控制得非常好。炸天婦羅分別有蝦， 南瓜和番薯。炸粉超薄，香口鬆脆，夠晒熱辣辣!我叫咗個火山丼， 分別有三文魚，吞拿魚溶， 海膽，蟹肉和魚籽。三文魚切到大大粒，夠晒厚肉，魚脂均勻，夠曬肥美。 海膽新鮮甜美，食一嚿好似唔夠喉，想再encore。 蟹肉鮮甜而且一d海水味都無，唔會太鹹。 魚籽好大粒， 咬落去爆汁好香甜而且又唔腥， 呢個飯簡直係我嘅摯愛。個套餐仲有個麵豉湯， 一般的麵豉湯我覺得好鹹， 但呢個湯竟然唔鹹之餘d豆腐粒仲好滑!蔥油又多， 昆布又爽口， 最重要湯係好夠熱!夜晚有套餐食，分別一個主菜，一個湯，一個天婦羅，一個燉蛋，非常豐富仲好抵食， 價錢都好合理。