麻王 (Closed)

想食酸菜魚好耐啦，今次就約朋友試下呢間新開嘅麻王，見佢嘅水煮同埋酸菜系列都好吸引！目標鮮明就係要試佢地啲酸菜魚，另外佢地嘅3餸4餸麵都好抵食，作為晚餐嚟講係港島區真係好少遇到$45就埋到單啊！先講講佢地酸菜魚，成碗都幾大碗，配埋飯男士都會飽啊！上面有滑滑魚片，無乜骨！下面原來暗藏玄機，有好多蔬菜，蓮藕、娃娃菜、豆芽、海帶，營養好均衡。一讚佢湯底唔會太咸又酸辣度都幾balance，令我都忍唔住呷咗幾啖。呢個酸菜魚小辣但辣勁都十足㗎！4餸麵可以選辣度同粉，粉我要咗紅薯粗粉，亦係佢menu上相片中個款粉。餸方面嗌咗肥牛、芋絲、萵筍同埋魚腐，每樣餸嘅份量都唔少，粉又好多。麵嘅面頭仲有一堆蒜蓉，以為會好重口但食落還好呢！不過嗌咗小辣唔算好辛辣，下次可以試下中辣先！全部餸都唔錯，萵筍煮完仲好翠綠爽口！紅薯粗粉滿足咗我想食寬粉嘅心，煙煙韌韌仲好彈！我地仲點咗兩個小食，麻辣鴨血辣味幾出，如果再滑啲就更好！紅油炒手皮滑內餡都包咗彈牙蝦肉，size又大有啲錯覺以為自己食緊雲吞。整體都好有特色，住附近又食辣人士真係要一試。佢堂食位置唔多，所以建議外賣啊！