上戶酒場 (Closed)

Happy Friday 同同事黎上戶酒場 chill 住 lunch，餐廳以木系為主，坐位寬敞舒適，係好傳統日式居酒屋的感覺。我地叫左兩個午市定食同串燒套餐。午餐有沙律、麵豉湯同小食 (餃子)，值得一讚既係個麵豉湯唔同平時是旦煮果啲，除左味道唔死咸，仲有好多配料，有蝦、蜆、豆腐粒同海帶。牛舌薄燒配三文魚炒飯 ($98）燒牛舌用鐵板上 ，每塊都鋪滿蒜粒同蔥花，個人建議唔好反啲牛舌直接食，咁樣個生熟程度就岩岩好。入口充滿濃郁既牛舌味同蒜蔥，好惹味。三文魚櫻花蝦炒飯乾身香口，粒粒分明，唔會食到食口油，好快食完一碗。上戶刺身盛配迷你烏冬 ($208)一上黎個靚靚擺盤已經好吸睛，刺身有油甘魚、三文魚、帶子、赤蝦同黑松露帆立貝，每款都肉質鮮嫩，鮮甜肥美。啤酒、自選串燒套餐 ($98)套餐可選四串串燒，款式多樣，例如雞頸肉、魷魚、雞翼黑豚肉腸、明太子蓮藕、油揚、鰻魚肝、雞腎、燒茄子田樂、同露筍等等。串燒燒得脆嫩香口，帶有焦香的味道，配啤酒一流。提提大家，餐廳而家仲做緊 Asahi 買一送一優惠($48)，唔想食串燒 / 一杯啤酒唔夠喉既可以無限追加，岩晒黎飲酒 Chill 返晚!❤️