新泰東南亞餐廳 (太子集團中心) (Closed)

今日又同Mr.J去尖沙咀食晚飯，今次Mr.J帶咗我去食泰國菜。餐廳喺Isquare附近，都唔算難搵。我哋大約7點3嚟到，雖然係星期一，但都差唔多滿座。依度嘅環境幾舒適幾闊落，同朋友邊食邊傾都唔錯。今日食咗1)串燒(2)肉碎生菜包(3)馬拉盞通菜(4)冬蔭功海鮮炒飯第一樣嚟到嘅係馬拉盞通菜，熱辣辣又香噴噴，淨係聞都覺得好好味呢。依度嘅馬拉盞通菜調味啱啱好，好夠火喉，唔會太鹹，亦唔會好油，非常適合我口味。第二樣嚟到嘅係肉碎生菜包，生菜同肉碎嘅份量差唔多，生菜都有成6至7塊。肉碎炒得好惹味，少少辣，口腔內充滿哂金不煥嘅味道，而且唔算多油，不錯。第三樣係串燒，豬雞牛每樣有兩串，豬同雞都燒到啱啱好，裡面仲有唔少嘅肉汁，食落好嫰滑；反而牛就好似燒耐咗，比較乾咗少少。沙嗲汁甜甜哋好好味。最後嘅係冬蔭公海鮮炒飯，起初以為海鮮係平時食嘅雜錦海鮮，會係假蟹柳、小蝦、小墨魚等等，點知原來係大蝦、大青口、墨魚片等等，感覺不錯。雖然係冬蔭公炒飯，但唔會太辣，酸酸哋，幾開胃。整體上我同Mr.J都好滿意依間餐廳，雖然價錢貴咗少少，但味道好就最重要！(老師名言:辛苦賺錢志在享受！)