666泰船麵 (仁愛街) (Closed)

喺附近行完商場，就想食啲東南亞嘢食，行過見到呢間餐廳就入咗去。入到去就見到個裝修好Stylish，好清楚咁見到個老細好鍾意玩，生活都多姿多彩。牛肉船金邊粉(細)碗麵湯底濃郁，金邊粉幼身咁食落同喺越南食嘅船麵一樣，而配料就有芽菜、香葉、炸豬皮、肥牛、牛丸同埋牛腩粒。值得一讚嘅係佢嘅炸豬皮真係炸得好脆，咬一啖同埋啲麵食，個口感配合得好好，牛丸都有牛肉味。豬肉船金邊粉呢個麵湯底同牛肉嗰款唔同，配料轉左做豬肉片、豬肉丸同埋豬肚。豬肉片嫩唔韌，豬肚就幾爽。泰式炸魚餅一上枱就聞到好香嘅泰式香料味，食落會覺得辣辣地，就咁食都正。如果點埋枱面嘅甜辣醬，味道會更加豐富。豬肉串燒呢個串燒咬落好鬆軟，似係用左刀背剁過，加上個沙嗲汁真係好好食。花膠椰子燉雞湯椰子肉非常之多，再加上佢有好多花膠，女朋友覺得非常之養生。而且飲完唔口渴，應該真係冇乜味精。泰式奶茶飲落唔錯，但個人鐘意茶味再比較濃啲嗰種。