上戶酒場 (Closed)

💛前菜前菜有紅蘿蔔，梨同青瓜條，嗰醬嘅原材料係沙甸魚同多春魚嘅，一啲唔會腥，幾惹味。💛伊佐木刺身魚肉質感係偏向煙靭，佢唔似三文魚嗰種好重油脂嘅感覺，而係偏向清爽嘅感覺。有兩個汁可以配，蘿蔔蓉柚子醋同芥末豉油，我比較鍾意芥末豉油多啲，感覺層次豐富咗，味道重咗。而食完刺身之後，店員會幫我哋將魚骨做湯，個湯都好清甜，好好飲。💛黑松露帶子手卷個手卷勁大份，而且黑松露同帶子都比得唔手軟，帶子有三大嚿，好鮮甜，黑松露完全唔會搶走海鮮嘅鮮味，兩者配合得啱啱好。💛 明太子奄列 櫻花蝦炸豆腐首先明太子奄列火候控制得啱啱好，有少少半流心嘅感覺，明太子嘅份量都好足夠，加埋啲柴魚食，唔會太鹹，味道好清新。炸豆腐都外脆內軟，咬落去豆腐好似識流走咁，但出邊仲好脆口。💛串燒 燒物有雞翼，黑豚五花腩，鰻魚肝，田樂茄子，秋葵，白鱔，燒手握飯團。最令我感到驚喜嘅就係黑豚五花腩同埋鰻魚肝。首先黑豚五花腩燒得啱啱好，咬落去可以做到好似牛肉咁鬆軟，調味都唔會太濃味，食完一串好想繼續食。鰻魚肝係偏向重口嘅串燒，好香口，佢個醬係甜甜鹹鹹咁，所以都唔會覺得太heavy。💛桃酒好啱女仔飲嘅酒，甜得來又有少少酒味，同韓式米酒有啲似。