八方台式麵屋 (九龍城廣場)

Open Now

Now Closed

今日過來九龍城訂蛋糕，訂完蛋糕嚟到九龍城廣場食個簡單晚餐。呢間台灣餐廳環境乾淨整潔，而且有幾多好評，所以試一試。呢度係自助形式order點餐，點完餐就入去搵位坐，唔需要加一。我哋點左兩個dinner set , 酸辣麵加原味鍋貼，另一個就點左滷肉飯加香酥豬扒。飲品就試左冷泡桂花烏龍茶和黑糖珍珠鮮奶。滷肉飯做得唔錯，油香味十足，肉粒帶有焦糖色，肥瘦均稱，口味唔會太鹹，有點甜甜嘅滷水味和花椒八角嘅香味。炸豬扒新鮮炸起，咬落脆卜卜，而且唔會成口粉，肉質軟淋，唔會鞋口。酸辣湯麵，材料好豐富，有肉絲，冬菇絲，金菇，木耳，甘筍，豆腐，筍等等，酸酸地唔太辣，可以揀新竹米粉或者麵。個人覺得配新竹米粉又幾好，因為新竹米粉質地比較幼細 ，可以吸到酸辣湯嘅味道。本來想試吓韭菜味嘅鍋貼，不過已經賣晒，原味鍋貼都唔錯，煎到金黃色脆卜卜，鍋貼皮亦夠薄。桂花烏龍茶冷泡茶，係一款唔甜嘅茶，飲落桂花味好香同好清新，黑糖珍珠鮮奶，啲珍珠仲暖暖地，QQ 軟綿綿 ，牛奶香醇，味道可以媲美珍珠奶茶店。