La Casa Burger & Pasta (豐隆工業大廈) (Closed)

喺九龍灣返工已經有一段時間，開頭唔熟路以為九龍灣只係得商場中嘅連鎖集團或者地面嘅茶記，後來先知道九龍灣都有好多隱世小店隱藏於工廈中！呢日就去咗La Casa Burger & Pasta買外賣，位於豐隆工業大廈內，只做外賣。套餐好豐富，有一款主食+小食+飲品，外賣自取仲有9折。我哋揀咗一個漢堡套餐，一個意粉套餐： 西冷黑松露水牛芝士漢堡 ($89)+薯角配茄汁+熱咖啡 (+$18) 雞肉羅勒青醬意粉 ($72)+意式肉丸 4件+可樂 (+$26) *價錢為折扣前 西冷黑松露水牛芝士漢堡 漢堡包烘得外脆內軟，而且入面塗咗牛油，食落充滿牛油香，西冷薄切形式，牛味濃重，夾住青瓜、生菜及蕃茄，配搭清新。不過店員遺漏咗最重要嘅水牛芝士及黑松露醬汁，變左有D失色！ 雞肉羅勒青醬意粉 意粉份量慷慨，意粉彈牙唔會太淋，掛滿羅勒青醬，食落好香。雞件煎香後肉質依然嫩滑，配搭紅色車厘茄，色彩繽紛，令人胃口大開！ 小食 薯角裝滿一盒，連薯皮去炸，薯味十足，口感軟綿，令人食唔停口！ 意式肉丸 肉丸用料實在，肉味濃郁，配酸甜嘅茄汁好開胃！ 另外仲包埋飲品。