Simplylife Bakery Cafe (Closed)

星期日既下晝一點零，唔使等位就入左去食個brunch😛 餐廳寬敞，座位舒服，適合兩個人靜靜地食餐飯傾下計。南瓜湯南瓜味濃，仲有芝士碎同香草係面，湯嘅口感頗滑，碟旁有一塊法包，包身軟熟，不過塊皮就比較硬，同友人share碟牛油用，建議將麵包沾湯，可以軟化麵包。香煎鰽魚茴香有機糙米飯食之前以為隻碟好深，但原來隻碟都幾淺下，飯量並唔多，亦有啲難𢳂飯，但醬汁香濃，飯有咬口，整體不錯。火腿蘑菇車打芝士奄列+香草燒薯+燒蕃茄擺盤有啲好笑，奄列超大份，但蕃茄同薯角就零零星星散落係旁邊。奄列內有拉芝，蘑菇同火腿，蛋味香濃，食落會覺得有啲滯。蕃茄嘅數量實在少得可憐，只有兩細舊，不過蕃茄係煎過，暖暖地，十分香甜。薯角煎得頗香，幾惹味，建議mix埋奄列既芝士汁一齊食。另外飲品方面奉送一杯桃味嘅冰茶，本身有問可唔可以轉熱飲，但居然要加錢，所以都係打消左呢個念頭。建議餐廳可以比支匙羹客人，因為杯野飲太大杯，一開始飲覺得冇乜味，但飲到一半會突然變甜，應該係d糖沉左底，所以建議邊拌勻邊飲。