鳴門割烹料理 (Closed)

今日要同媽媽去megabox睇傢俬，同媽媽出街當然要順便帶佢食下最愛嘅日本菜，係megabox斜對面有間鳴門割烹料理，位置都幾易揾。餐廳樓底超高超寬敞，三面都係落地大玻璃窗，採光超好，枱同枱之間仲有屏幕阻隔，食得好安心！逢週末同公眾假期會有90分鐘半自助餐，成人每位$268，長者同小童都有優惠價，每位仲送磯煮鮑魚一隻。主食八選一，我哋今次就揀咗三色丼、網燒安格斯牛扒，前者有海膽、三文魚籽、火炙鰈魚邊，整體味道豐富，非常鮮美，牛扒就揀咗五成熟，加上惹味蒜汁。刺身、壽司、炸物等全部任點任食，上菜速度都幾快！前菜小食有沙律、味付螺肉等，個人幾鐘意個角切魚生沙律，除左有三文魚、油甘魚魚生角切，沙律菜、洋蔥新鮮爽口，酸甜醬汁非常開胃。刺身選擇都唔少，而且樣樣都係厚切又高質，三文魚腩尤其新鮮肥美，磯煮鮑魚入味彈牙！壽司就有十款任君選擇，加州卷餡料豐富，劍魚腩入口綿軟鮮甜。熱食方面，媽媽好欣賞日式蒸蛋，蛋味濃味鮮，質感嫩滑！個人就推薦厚燒牛舌，表面焦香，咬落油香四溢！炸物就新鮮炸起，比較油膩，芝士年糕軟糯。飲汽水嘅話會提供冰底，係好貼心嘅安排！除咗汽水，仲有大大杯巨峰、白桃乳酸特飲，味道清爽！