El Barrio (Closed)

當日諗住搵個中學同學聚舊，約咗係將軍澳中心商場，本身諗住去海X撈，但好多人等位，大家耐冇見都想搵個坐得耐啲、唔趕人走傾到偈既餐廳，就見到有間新開嘅餐廳，食西班牙菜，見冇乜人就入去試吓，冇特別期望，但反而有驚喜！餐廳環境幾舒服😌當晚人唔多，餐廳播放西班牙音樂。侍應推介左個二人晚餐，唔會好似一般西餐咁死板，比湯同沙律你，頭盤係西班牙風乾火腿沙律拼盤，味道及份量OK啦；Tapas有3款，包括鮮蕃茄西班牙脆包、西班牙炒辣肉腸、西班牙薯仔奄列；主菜係西班牙海鮮飯同西班牙烤豬鞍架，但係當日餐廳賣晒、問我哋可唔可以轉烤全魚，但我同朋友都唔食魚既，於是我地問轉第二款得唔得？我哋睇中左脆皮西班牙乳豬，餐廳經理非常識做，比咗個驚喜又合理既優惠價我地去upgrade，試業期間果然有着數，兩個主菜個份量好夠，西班牙海鮮飯海鮮份量多，飯底有海鮮味；脆皮西班牙燒乳豬皮多汁，西班牙豬肉味濃郁，伊比利亞豬果然係豬肉嘅皇道，恰到好處。加埋杯正宗西班牙Estrella Damm 風味生啤酒簡直一流！我哋兩個都好盡興，真心性價比高，兩位連加一都係$800