Say Cheese (將軍澳中心) (Closed)

呢間餐廳設計幾靚，裝潢令人好舒服，環境好好坐。晚餐叫咗個二人餐，有主菜（雞/牛/魚）、飯/麵、餐包、甜品同飲品。首先係蒜蓉包，好香蒜蓉味、好脆，不過好細個，兩啖食完。是日餐湯個湯比較特別，係用紫薯整，甜甜地，第一次飲。個人嚟講不好紫薯所以覺得麻麻。本身餐牌冇指明咩湯，所以冇得揀。Main就叫咗牛排，都算比較大塊，下面用西蘭花、紅蘿蔔同薯仔放底，味道好raw。塊排叫咗五成熟，但佢比五成更熟，煎得唔平均，有一半以上都係全熟咁濟，肉質咬落好韌，略有牛味。個汁都ok，冇乜特別。個飯份量好少，我諗得半碗到，以二人餐嚟講好唔夠。啲飯粒偏大粒同硬，好重奶油味，重得嚟好溜，個鵝肝好食，入口即溶同好香。飲品係水果茶，同平時飲嘅好唔同，充滿水果嘅酸澀味，我就鍾意偏甜嘅。😅甜品揀咗雪糕，係movenpick嘅曲奇味。同湯一樣，冇得揀味道。呢個套餐$388，性價比好低，兩個人食咗四百幾蚊都唔飽，又唔係特別好食。