Video
Read full review
2020-07-20
1686 views
話說我最近不斷食辣，自覺愈來愈食得辣😝。呢日中午就去咗太子通菜街試頗出名嘅「川之味麻辣米線」。下午兩點鐘去到餐廳有唔少人食緊，而其後堂食同外賣嘅訂單繼續來。店員姐姐們服務態度都OK。餐廳環境同衞生都比想像中好，畢竟門面有啲舊同簡陋😳。我坐近門口位比較熱，因為係咁有人入、有人出，而好多人又無乜手尾閂好門，唉。不過冷氣充足嘅。我第一次嚟食，所以要睇餐牌先知有乜食。好搞笑地張餐牌係無寫價錢的😅，可能方便加價都唔洗重印...。但價錢係有張貼於牆壁嘅，自己無留意啫🙈。$34得一餸米線都幾貴，餸主要分$7或$8類。麻辣有得自選辣度，分別為加$3嘅大辣、加$2嘅中辣、加$1嘅小辣五至十級以及$0嘅小辣一至四級。我見好多人都係嗌4️⃣四小辣，可能食得辣，但又唔想加錢，哈哈。食開BB辣嘅我就要咗二小辣🌶🌶，諗住自己應該應付到...，點知辣到HIHI！唔怪得每枱都放咗紙巾啦，而且其他食客都又喊、又咳、又流鼻水🤣。辣度十足，麻味正常，但我覺得唔夠鹹，所以唔夠惹味囉！個人鍾意鹹啲嘅麻辣味，佢嘅辣直頭係嗆喉程度，好似濁親咁。最終辣到我要拎碗仔隔開湯先食到，太廢😭。米線偏粗身，口感少少爽。我最欣賞係湯底本身已經搭配咗
話說我最近不斷食辣，自覺愈來愈食得辣😝。呢日中午就去咗太子通菜街試頗出名嘅「川之味麻辣米線」。下午兩點鐘去到餐廳有唔少人食緊，而其後堂食同外賣嘅訂單繼續來。店員姐姐們服務態度都OK。
餐廳環境同衞生都比想像中好，畢竟門面有啲舊同簡陋😳。我坐近門口位比較熱，因為係咁有人入、有人出，而好多人又無乜手尾閂好門，唉。不過冷氣充足嘅。
我第一次嚟食，所以要睇餐牌先知有乜食。好搞笑地張餐牌係無寫價錢的😅，可能方便加價都唔洗重印...。
但價錢係有張貼於牆壁嘅，自己無留意啫🙈。
$34得一餸米線都幾貴，餸主要分$7或$8類。麻辣有得自選辣度，分別為加$3嘅大辣[辣至癲峰]、加$2嘅中辣[辣到飛起]、加$1嘅小辣五至十級[辣得過癮]以及$0嘅小辣一至四級[辣味淺嘗]。我見好多人都係嗌4️⃣四小辣，可能食得辣，但又唔想加錢，哈哈。
食開BB辣嘅我就要咗二小辣🌶🌶，諗住自己應該應付到...，點知辣到HIHI！唔怪得每枱都放咗紙巾啦，而且其他食客都又喊、又咳、又流鼻水🤣。辣度十足，麻味正常，但我覺得唔夠鹹，所以唔夠惹味囉！個人鍾意鹹啲嘅麻辣味，佢嘅辣直頭係嗆喉程度，好似濁親咁。最終辣到我要拎碗仔隔開湯先食到，太廢😭。
米線偏粗身，口感少少爽。我最欣賞係湯底本身已經搭配咗芽菜同腐皮，仲要係大量嗰隻，正啊👍！
第一款餸係🐷豬軟骨($8餸)，有兩件，確係燜得幾淋、幾入味，啱哂補充骨膠原。
第二款餸係生根($7餸)，我貪佢夠索湯嘛，估唔到餐廳都幾慷慨，生根有成七、八嚿，相對抵食😙。
凍香濃豆漿加$5就有，亦唔太細杯，解辣一流😊。
總括嚟講，我覺得呢間米線都可以一嚐，但我就未必會再食了，因為主角麻辣得個辣字，但唔夠好味，無令我想返轉頭嘅衝動🙊。不過啲餸就幾好嘅，而且份量多、夠飽，但始終性價比偏低，我咁樣埋單都要$47。
Post
