Video
Read full review
2023-05-27
1810 views
Chullschick📍中環蘇豪嘉咸街45-53號地下D號舖只要提起秘魯菜，我就即刻會諗呢位於中環soho區嘅呢間秘魯餐廳。今次係我第二次到訪，兩次都係食佢嘅lunch menu，個人認為呢個地段呢講，定價算貼地，而且食物同服預質素keep到水準，不枉我大熱天時行咁多級樓梯上上落落都要帶朋友一試佢嘅美食！第一次嚟到，唔知頭唔知路咁同三位好朋友叫咗好多嘢食，今次同朋友兩個人嚟到，參考返上次食過覺得好食嘅嘢叫咗以下嘅set lunch，雖然已經係第二次食，但當我食到一啲平時食唔到嘅調味，都會好驚訝，原來呢個世界唔同嘅料理煮同一樣嘅食材係有咁層出不窮嘅味道！今次想特別讚一讚一位男店員，佢安排咗我哋坐低之後好主動咁拎Menu嚟介紹，不停推介一啲佢覺得好有特色嘅菜式俾我哋，食到一半又會過嚟同我哋傾下偈，問下我哋覺得啲嘢食如何，令我哋有賓至如歸嘅感覺。 💰$100煙燻豬肉三文治 🥪 上一次嚟食烤雞三文治，今次當然要試吓另一款啦。麵包同樣係自家製Chulls Bread，口感好脆口，我幾鍾意！煙燻豬肉先慢煮13個鐘，再以煙燻爐燻製1個鐘，雖然豬肉望落去肥肉偏多，但腩肉位置嘅脂肪入口即溶，加埋有秘魯莎
📍中環蘇豪嘉咸街45-53號地下D號舖
只要提起秘魯菜，我就即刻會諗呢位於中環soho區嘅呢間秘魯餐廳。今次係我第二次到訪，兩次都係食佢嘅lunch menu，個人認為呢個地段呢講，定價算貼地，而且食物同服預質素keep到水準，不枉我大熱天時行咁多級樓梯上上落落都要帶朋友一試佢嘅美食！
第一次嚟到，唔知頭唔知路咁同三位好朋友叫咗好多嘢食，今次同朋友兩個人嚟到，參考返上次食過覺得好食嘅嘢叫咗以下嘅set lunch，雖然已經係第二次食，但當我食到一啲平時食唔到嘅調味，都會好驚訝，原來呢個世界唔同嘅料理煮同一樣嘅食材係有咁層出不窮嘅味道！
今次想特別讚一讚一位男店員，佢安排咗我哋坐低之後好主動咁拎Menu嚟介紹，不停推介一啲佢覺得好有特色嘅菜式俾我哋，食到一半又會過嚟同我哋傾下偈，問下我哋覺得啲嘢食如何，令我哋有賓至如歸嘅感覺。
[價錢 Price]
💰$100
煙燻豬肉三文治 🥪
上一次嚟食烤雞三文治，今次當然要試吓另一款啦。麵包同樣係自家製Chulls Bread，口感好脆口，我幾鍾意！煙燻豬肉先慢煮13個鐘，再以煙燻爐燻製1個鐘，雖然豬肉望落去肥肉偏多，但腩肉位置嘅脂肪入口即溶，加埋有秘魯莎莎醬同洋蔥等配料中和返，食完唔會覺得好heavy。
話雖如此，但係如果比較兩款三文治，我覺得烤雞三文治比較好食，因為佢嘅餡料有用他他醬調配過，比較適合我口味。而呢款煙燻豬肉三文治因為用咗秘魯莎莎醬，所以口感酸酸辣辣，係我未食過嘅味道，可能唔係太習慣，不過都好味嘅。
重點係想同大家推介一下當日嘅Special side dish — broccoli and carrots，我哋以為佢係熱炒嘅配菜，點知原來係好似沙律咁嘅涼拌菜，仲有粟米粒粒撈埋一齊。佢嘅調味無沙律醬咁甜同肥膩，食落好light，令唔去太鍾意食沙律嘅我講咗句「如果每日都有咁嘅沙律食，要我日日食沙律我都肯制！」，可想而知係幾好食！
[價錢 Price]
💰$102
招牌秘魯烤雞 四分一隻 🐓
話明係招牌秘魯烤雞，當然有佢過人之處啦！餐廳用咗黑啤、薑、迷迭香等多款香料醃雞，醃足兩日，再烤1個鐘，所以佢嘅烤雞皮薄得嚟非常香口，食埋層皮都唔會覺得好油膩！烤雞油脂唔算太多，雞肉亦嫩滑多汁，四分一隻就已經足以送晒成個餐，食得好滿足！
每個招牌秘魯烤雞餐都可以選擇兩款配菜，我哋就揀咗薯條同埋蒜香飯。好彩佢嘅飯唔係印度米，如果唔係一定會扣晒分！蒜香嘅味道唔算太突出，不過加咗啲好香嘅蔥花，食落去有少少似食緊港式煲仔飯嘅口感，不過佢就梗係無飯焦啦！唔知佢算唔算係秘魯嘅特色主食之一呢，大家有興趣嘅可以試下。我個人嘅做法就係將烤雞拆肉，再鋪滿整個細細嘅飯撈埋一齊食，咁每一啖都會食到蔥、蒜、飯同埋雞肉。另一款配菜薯條本身炸得香口，點埋個黃辣椒醬就一流喇！
[價錢 Price]
💰$0
餐湯 🥕🥣
朋友揀咗餐湯，今日係紅蘿蔔湯，佢嘅湯比起一般嘅西餐餐湯稀，但又比起中湯嘅口感濃郁，飲得到係用紅蘿蔔打蓉整成，味道唔會太濃，都好creamy，不過夏天飲就有少少熱，而且個碗好淺身，份量唔算太多。
[價錢 Price]
💰$0
薑味汽水🥤
上次我都係飲ginger ale，果然夏天就係要飲啲咁解渴嘅冰涼飲品！
Post
