Video
Read full review
2013-10-18
98 views
天后已成為另一個尋找美食小區，單單一條短短嘅電氣道（只計天后，唔計北角一截），已有超過50間食肆，咩菜系都有，平有平食，貴有貴食。今晚跟食友嚟到「阿糊米線」，可以話平得嚟又食到好嘢，抵得得嚟又有特色，佢哋幾款主打嘅招牌米線，又確實頗有心思。雲南米線鋪依家開到成行成市，要突圍又實在唔客易。睇番「開飯喇！」嘅資料，「阿糊米線」前身叫「阿糊雲南米線」，賣嘅跟坊間米線鋪差唔多，所以早幾個月休業重開，實行嚟個形象大革新，一於洗去傳統、老土舊式嘅格局，將成間鋪變得煥然一新。門口大大個鮮黃色「阿糊」商標，已甚為搶眼，一室摩登、新潮嘅裝潢，簡潔企理，無一般舊式米線鋪又窄又逼。唔止形象革新，店名去除咗「雲南」二字，就喺少啲束縛，務求米線都要起起革命。再者，客人俾錢唔喺食裝修，食物質量至喺硬道理，所以，阿糊精心炮製別出心裁嘅五色湯底，務求殺出新血路。五色唔喺指5種顏色，而喺5種特色：「阿糊金湯米線 $30」、「金銀蛋芫茜湯米線 $30」、「川味酸辣米線 $25」、「鮮茄雜菜湯米線 $25」、「上湯時菜湯米線 $20」，當然總有人唔喜歡食米線嘅，可改選烏冬或公仔麵，不過，據介紹米線喺搵本地麵廠新鮮製作，粗幼
雲南米線鋪依家開到成行成市，要突圍又實在唔客易。睇番「開飯喇！」嘅資料，「阿糊米線」前身叫「阿糊雲南米線」，賣嘅跟坊間米線鋪差唔多，所以早幾個月休業重開，實行嚟個形象大革新，一於洗去傳統、老土舊式嘅格局，將成間鋪變得煥然一新。門口大大個鮮黃色「阿糊」商標，已甚為搶眼，一室摩登、新潮嘅裝潢，簡潔企理，無一般舊式米線鋪又窄又逼。
唔止形象革新，店名去除咗「雲南」二字，就喺少啲束縛，務求米線都要起起革命。再者，客人俾錢唔喺食裝修，食物質量至喺硬道理，所以，阿糊精心炮製別出心裁嘅五色湯底，務求殺出新血路。五色唔喺指5種顏色，而喺5種特色：「阿糊金湯米線 $30」、「金銀蛋芫茜湯米線 $30」、「川味酸辣米線 $25」、「鮮茄雜菜湯米線 $25」、「上湯時菜湯米線 $20」，當然總有人唔喜歡食米線嘅，可改選烏冬或公仔麵，不過，據介紹米線喺搵本地麵廠新鮮製作，粗幼恰好，入口滑溜，無理由新鮮好嘢唔揀架。「五色米線」選定款式，可自行加配料，近30款，分 +$5、+$8、+$12三個級別，唔想煩，如小弟咗懶，店方亦以五色米線設定咗5款招牌推介，下文再詳細介紹。
為照顧客人嘅需要，以及港人喜歡多選擇嘅特性，店方除米線以外，仲有雙拼飯（10款）、小食（26款）及飲品。此外，米線或雙拼飯可以 +$5 配送汽水一罐，+$8 配送豆漿一杯，+$10 配送阿糊紅紅黑奶茶。最有趣喺小食又可以變套餐，只要乖乖咁奉上20個大洋，就附送香飯 / 肉燥飯 / 炸醬飯及汽水，挺划算嘅安排！
如果兩個人嚟，再懶啲，叫二人餐喺必然之選，A餐賣$178，B餐賣$148，已包3個小食，2個主食，飲品及甜品，睇睇份量，相信3個人都夠晒食！阿糊紅紅黑奶茶 $15
天口仲熱有啲渴，飲杯阿糊紅紅黑奶茶涼快吓先！紅紅黑喺乜，就喺紅豆同燒仙草，咁燒仙草又喺乜，咪涼粉囉，哈哈。用膠杯盛載，以膠膜封實，常見嘅台式凍飲，因為成杯預製好放入雪櫃雪凍，原汁原味，絕唔會越飲越淡，而且少甜，邊飲邊吮（紅豆 / 涼粉），好啱飲。
一般米線鋪都只喺賣三幾款小食，既然要革新，小食都唔可以求其，但多到有成26款就有啲估佢唔到，而且有好多特色選擇，例如：阿糊羊腩、糖醋烤骨、孜然雞翼、紫菜素鴨、台灣辣肉腸……，真喺樣樣都想試。菜肉餃子 $18
一客4件，粒粒包得飽滿，炸得金黃。一咬咔嚓一聲，外層十分香脆，白菜、豬肉所做嘅餡料，算喺平均，調味適中。
鹽酥魷魚 $38
雖然無逐條逐條數，但一客有唔少，條條炸得「勻巡」，粉漿薄薄，鹽酥惹味得嚟無過鹹，入口又唔油膩，魷魚鬚幾有「肉地」，柔軟唔會炸到乾爭爭，送酒小食佳品，值得一試。
蒜香炸豬手 $38
豬手食得多，估唔到眼前份蒜香炸豬手咁正，有啲意外驚喜。原來豬手先用鹵水煮過，泡油之後再灑上大量金蒜，食落外皮甘脆，有嚼勁又入味，金蒜更帶嚟多一番層次嘅味道；而皮下嘅脂肪富膠質，幾黏口，好似食咗成匙羹骨膠原咁。
阿糊紅油白肉 $38喺餐牌未有嘅菜式，只喺貼晌枱上嘅「期間限定」新菜，限定推出，試試水溫，好賣就再列入餐牌。實物無想像中咁肥，肥瘦相對嘅五花腩切得好薄好薄，入口一啲都唔會覺得佢好肥，又因為已經用鹵水滷過，再淋上辣椒紅油，食起嚟好有風味。
麻辣口水雞 $38
最後一道送上嘅小食，雞肉皮薄肉滑，鮮嫩味美，據介紹喺用上120日大嘅海南雞，貨源跟「泰國人海南雞」一樣，原來大家均屬同一集團，唔怪之得「阿糊」隔離就喺「泰國人」啦。雞好都要有好醬汁襯托，醬汁輕辣，辣中帶麻，小弟都可以入口，所以唔算好辣，而且晌上面糝滿花生碎、芝麻粒，添口感，又添香味！
上文講過基本新推出嘅五色湯底，可謂精心炮製，店方以五色湯底為基礎，再加入三數款餸料，設定出5款招牌米線推介，依家就同大家分享一下。
阿糊金湯餃子雞米線 $58何謂「金湯」，原來以喇沙作為湯底，再加入菜肉餃及海南雞，真喺非常有創意。可能你會疑問佢啲喇沙湯底掂唔掂？小弟都有咁諗過，但當你知道佢哋背後母公司喺做泰國食品代理，揀手食材、香料，要搵靚貨一啲唔難，所以都將啲新鮮香料架在牆上當裝飾，故此做出嚟嘅湯底濃郁唔馬虎，雞湯、咖喱、椰香夠平衡，唔會過辣，又帶點點甜味。雞件鮮嫩唔再多講，餃子飽滿多餡，仲加配鹵水蛋同豆卜，最正喺豆卜吸滿湯汁更添惹味。
金銀蛋素鮮菌芫茜湯米線 $48
5款之中，以依個芫茜湯底最清最健康，清熱又下火，湯底鮮甜，芫茜味夠強勢，不過芫茜朕味就唔喺人人啱。餸料有皮蛋、鹹蛋、豆腐、鮮菌，頗豐富，好適合素食者。
鮮茄鴛鴦肉片雜菜湯米線 $43鮮茄湯底一向都好有市場，但做得好味唔容易，阿糊嘅鮮茄湯底真喺不俗，茄味自然，又夠濃郁，酸香醒胃，撈一撈仲有好多蕃茄肉、甘筍、洋蔥……等等，製作用心有誠意。配上雜菌、牛肉片及豬肉片，切得大片，又夠腍滑，仲有用料不賴。
川味炸醬牛肉酸菜米線 $43無論賣相、味道都較似傳統雲南米線，故此見到有埋芽菜、鮮腐皮，嗜辣者絕對要揀依款米線，因為辣度十足，原來有大、中、小辣，總之就減減辣，唔使食到冒汗。配料都好正，有辣味肉燥、牛腩、酸菜，全部都屬於重口味，減啲辣就好合小弟口味。
至尊三鹵上湯時菜米線 $38另一款湯底較清嘅米線，只喺上湯時菜，不過就無芫茜湯底咁素，因為配菜喺全肉，所謂三鹵，道喺香菇肉燥、腩肉同豬大腸，仲醒多半隻鹵蛋添。將香菇肉燥跟上湯撈勻，味道變得不一樣，湯底變得更香，多幾分惹味，而腩肉入味鬆軟，喺肥肉稍多；至於豬大腸，煙韌爽口又唔羶，兼且少肥，唔錯！
部份食友意猶未盡，決意整多過雙拼飯，雙拼飯其實喺以肉燥飯做膽，再配另一款餸料，如原汁牛腩、台灣辣肉腸、脆皮豆腐……等共10款，而我哋就點咗瑞士雞翼雙拼飯。瑞士雞翼肉燥飯 $38
一碟飯有三大隻瑞士雞翼，配以軟熟嘅白飯，伴啲時菜，再淋上肉燥，賣相普普通通，但估唔到微甜嘅瑞士雞翼味道不俗，肉燥亦好濃香，又淋得夠多，真喺撈飯一流。
睇嚟今次改革，雖然一樣賣番米線，但晌用料、配搭、創意方面，都有心有鬥志；跳出框框，但又唔會太亂嚟，幾道招牌米線推介，仲甚有驚喜，天后區嘅朋友可能又多一間飯堂食店。
Post
