金記冰室 (Closed)

星期六兩口子放工已經係下午茶時間，由於超級極度肚餓，兩個人叫左成4樣野。咖哩吉列豬扒飯嘅咖哩汁比起以前稀左，好彩夠味唔太辣，加左少少椰奶，撈飯食幾好，呢度嘅吉列一向唔錯，豬扒大塊炸得鬆脆。魚柳包薯條實在係大滿足，粗薯熱辣辣又夠多，魚柳包有魚柳有番茄有生菜有他他醬，個包加牛油烘過，絕不欺場。西多士有花生醬有牛油有大量糖漿，花生醬連麵包角位都有，岩岩炸起冇理由唔好食啦。雜果沙律一黎到我地有少少嚇親，有成4個scoops咁多，新鮮蘋果粒薯仔粒同罐頭雜果椰果都有，係同我想像中一樣嘅茶餐廳雜果沙律，好食超級飽嘅午餐連下午茶。