Pepper Lunch (黃埔天地美食坊)

Open Now

Now Closed

響黃埔附近做完嘢又全日未食嘢，所以想搵個簡單快啲唔使等嘅地方食晚飯，之前經過見到呢間pepper lunch都有啲人響度排隊，所以一路都冇試過，今次可能夜咗少少，所以我一個人唔使排隊即刻入到去，終於可以食吓呢一間嘞。另外一個重點就係佢好近黃埔地鐵站，食完就算落雨都係跑過一條馬路就已經搞掂，或者直接響下便巴士總站搭車走都得，所以位置方便真係幾好。今次可能真係因為肚餓，所以重手叫咗一份牛肉拼芝士醬飯，再加雞蛋再加芝士，仲要加多個季節湯，同埋涼拌芝麻醬西蘭花，最後加多一杯Pepsi添。雙重芝士夾擊之下真係好香，加埋隻蛋實在冇得輸，不過仲有一份芝士醬俾我，再落埋落去就好似比較濕咗啲，所以我等啲響個鐵板度煎燶少少先加落去。個餐湯冇乜特別，個人覺得一定要飲咗先至好食飯，如果唔係個湯會冇乜味。西蘭花就真係滾水淥西蘭花，如果冇芝麻醬就一啲味都冇同埋比較淋。整體嚟講都維持到水準嘅，係今次自己衝動叫多咗少少嘢，下次跟返正常份量應該冇問題。