冰雪公主 (Closed)

荃灣一向都好多野食，經過見到一間個名咁特別叫"冰雪公主"既餐廳就入左去試下。入面既裝修比我既感覺好舒服，係一間韓國既cafe，同時又提供遊戲比客人玩，好似飛行棋，波子棋等等，令到食客唔會話食完就即刻走，抵讚！雖然餐廳主打好多甜品，但係我地下午去到都會提供熟食既套餐餐牌，可以滿足到好似我咁，中午想食飽肚既人。番茄肉醬意粉，新鮮熱辣，好多肉醬，入口啖啖肉之餘又有濃郁番茄味，絕非一般街外肉醬意粉可比！大蝦奇脆卷配薯條，幼身薯條好食，大蝦奇脆卷好多蝦，帶有少少辣，皮夠簿，唔會太大舊放唔到入口，幾好食。士多啤梨年糕，上層放左士多啤梨，又搽上帶有少少酒味既士多啤梨醬，下面係藏有年糕既多士，同樣都係韓式既食法，令到本身乾既多士唔會太乾。爆谷雪糕，未食過呢種甜品，感覺好新鮮。內層雪糕，外層爆谷，賣相味道同樣出眾，值得試！海洋檸檬梳打，少酸有氣，入口清新，成杯藍色好搶眼。朱古力曲奇特飲，重點推介，碎碎既曲奇上面有cream，好好味，每一啖都有濃厚既曲奇味，但又好滑，飲落好舒服。藍莓汁，新鮮揸，入口好滑，有沙冰既感覺！如果想舒適享受美味既一餐，我覺得冰雪公主都係一個唔錯既選擇。