至尊重慶雞煲 (堅拿道西) (Closed)

成班老友約出嚟食飯吹水，我哋成班基民，最緊要就係食物好食，環境衛生，坐得小小迫都無所謂。最鍾意就係鵝頸橋旁呢間經濟又好食雞煲。我哋都食到熟曬，一入門口已經拎定嘢飲先，罐裝野飲好多選擇，仲有清涼茶薏米水，飲咗都冇咁熱氣。而且仲有我最喜歡食嘅拍青瓜同埋茶葉蛋。拍青瓜出邊幾十蚊一碟都冇佢整得咁有四川風味。好快雞煲就上枱啦！可以即刻食！雞煲d醬汁真係煮得好好味。雞件啖啖肉，軟滑多汁。今次係美味的辣，食得好刺激。食完雞之後果汁仲好好味，一於放埋花膠同埋牛柏葉再滾下，食得更加惹味。差唔多時間就加湯打邊爐，呢度食係有限時嘅，因為差唔多九點鐘出邊已經有人排隊等位。任點任食嘅打邊爐了都有好多㗎！其中青口、肥牛肉、同埋自家製韭菜水餃都係我最喜歡食嘅。密密食之後，最後仲有雪條或者雪糕杯食，真係由頭食到落尾，每人百幾蚊埋單，真係銅鑼灣飯堂之選擇。