夏麵館 (活@KCC) (Closed)

今次姨甥返香港放暑假，如果話有啲咩特別想帶佢去食的話，應該要數上海菜， 可惜一直都約唔齊人囉😕。上海野咁飽肚，要人多先食得過癮架嘛！既然係咁，我今日唯有先帶佢食夏麵館頂住癮啦，呢款新派上海菜小館，人少少都食到嘅。一如以往，姨甥仔一個人可以食兩個人嘅份量，加埋我話要減肥嘅半個人，我地又試叫到一枱都係囉🤭😝！先嚟三個小食，全部都係有人話想食🙄，川味口水雞，上枱原來好鬼大份，比佢嚇親，雞肉嫩滑又冇乜骨，夠哂辛辣好惹味👍手抓蔥油餅，嚟到覺得個賣相麻麻地，但其實好香好脆，食不停口😋食上海野必點燻蛋，不過我就覺得佢煙燻味唔夠，同有點偏鹹，似鹵蛋多啲。主食我都估到有人實點排骨擔擔麵架喇，排骨炸得酥香，擔擔麵味道唔錯，只係個湯略嫌烯左啲唔夠花生醬味喎。我就諗住要食少啲肉，而且有點口水雞，所以主食我只點左個蔥油開洋拌麵，呢個就冇乜特別，不過不失啦。食完主食，點都要食返啲甜野嘅，有人話輕輕地叫個高力豆沙啦😅！咁呢樣呢度又幾好，事關高力豆沙一份三件，我地兩個人都食到，如果去正常上海菜館，就好多野都點唔到架喇！